Croesawodd Mabon ap Gwynfor bawb i'r cyfarfod, gan ymddiheuro am yr amser sydd wedi mynd heibio ers y cyfarfod blaenorol.

Cafodd cofnodion y cyfarfod a gynhaliwyd ar 29 Mehefin 2023 eu cymeradwyo.

Cynigiodd Mabon ap Gwynfor ei fod ef yn parhau i Gadeirio’r grŵp, gan gadarnhau nad oedd unrhyw enwebiadau eraill wedi dod i law, nac unrhyw wrthwynebiadau wedi'u mynegi.

Diolchwyd i Seafish am wasanaethu fel Ysgrifenyddiaeth y grŵp. Bydd yn parhau i gyflawni’r rôl hon.

Rhoddodd Jon Parker ddiweddariad ar ran Aquaculture Industry Wales. Roedd y pynciau y soniwyd amdanynt yn cynnwys gwaith ar gimychiaid pigog, gwaith ymchwil a gweithgarwch sy'n cael ei arwain gan Glwstwr Busnes y De-orllewin, uwchsgilio, a’r broses o ddenu newydd-ddyfodiaid. Tynnwyd sylw at yr angen am gydraddoldeb o ran cyllid a gwell dealltwriaeth o'r effaith gadarnhaol y gall cydweithio rhwng diwydiant a chymunedau ymchwil ei chael.

Yn ôl James Wilson, er bod clwstwr Bangor ar lwybr gwahanol, mae’n rhannu'r un gwerthoedd ag AIW. Mae’r gwaith sy’n cael ei wneud â Phrifysgol Bangor, Seafish a rhanddeiliaid allweddol eraill yn parhau, a’r nod yw datblygu gwaith ymchwil a chydweithio ar y rhwystrau, y cyfleoedd a'r manteision sydd ynghlwm wrth gynyddu cynhyrchiant. Mae angen ailsefydlu’r gallu i gael mynediad diogel a sefydlog i'r farchnad, a hynny er mwyn cydbwyso'r cyflenwad a'r galw.

Rhoddodd Aoife Martin gyflwyniad ar y gwaith sy'n cael ei ddatblygu yng Nghymru gan Seafish i gefnogi'r sector dyframaeth, ac ar gynhyrchion a gwasanaethau perthnasol ehangach Seafish. Roedd y prif bwyntiau’n cynnwys y canlynol:

·         Mae James Wilson a Lewis Le Vay yn cynrychioli diwydiant cregyn gleision y Fenai yn y Gweithgor Rhanddeiliaid ar Bysgod Cregyn, sy'n gweithio ar wella ansawdd dŵr i gefnogi twf yn niwydiant dyframaeth y DU;

·         Mae’r Fenai wedi’i chynnwys yn y gwaith sy’n cael ei wneud i gynyddu dealltwriaeth ynghylch gwasanaethau ecosystem a buddion lles cyhoeddus, a hynny fel bod llunwyr polisi a defnyddwyr yn deall y potensial;

·         Mae dulliau arloesol o ddefnyddio cregyn gleision yn cael eu harchwilio er mwyn dod o hyd i ffyrdd o gynyddu'r galw;

·         Mae Seafish yn cydweithio â Chanolfan Gwyddorau’r Amgylchedd, Pysgodfeydd a Dyframaethu (Cefas) er mwyn ceisio ehangu'r data ar ymchwil economaidd a pherfformiad sydd ar gael; ac

·         Mae 'map ffordd' ar gyfer sicrhau cadwyn gyflenwi wydn ar gyfer bwyd môr yng Nghymru yn cael ei ddatblygu, ac mae’r map ffordd hwn yn destun mewnbwn gan y diwydiant, y byd academaidd a Llywodraeth Cymru.

Gwahoddodd y Cadeirydd bawb a oedd yn bresennol i rannu eu sylwadau, a llywiodd drafodaeth agored ar ddyframaeth yng Nghymru. Roedd y pynciau allweddol a ddaeth i’r amlwg yn cynnwys y canlynol:

·         Cyfleoedd twf a ddaw yn sgil systemau dyframaethu ail-gylchdroi  (RAS);

·         Diffyg cyllid a chyfyngiadau ar gyllidebau blynyddol;

·         Cytundebau gwleidyddol sy'n effeithio ar fynediad i farchnadoedd yr UE;

·         Heriau sy’n gysylltiedig â chynllunio morol a gwasgfa ofodol;

·         Gwella strwythur llywodraethu Llywodraeth Cymru ym maes pysgodfeydd;

·         Cyfleoedd i Gymru arwain mewn rhai meysydd, gan fod y buddsoddiad sy’n ofynnol yn gymharol fach;

·         Diffyg strategaeth glir ar gyfer y diwydiant bwyd môr yng Nghymru, a'r posibilrwydd y gall y 'map ffordd' a grybwyllir uchod ddarparu ffocws ar gyfer gweithredu sydd i’w groesawu.

Awgrymodd y Cadeirydd ei fod yn anfon llythyr at Lywodraeth Cymru ar ran y Grŵp Trawsbleidiol, er mwyn codi'r materion a nodwyd a gofyn am ymateb. Cadarnhaodd bawb y byddent yn croesawu'r cam hwn. Gwahoddwyd pawb i anfon manylion yr heriau allweddol y dylid eu cynnwys yn y llythyr at mabon.ap.gwynfor@senedd.cymru, a hynny erbyn dydd Gwener 20 Medi.

Nodwyd manylion yr Aelodau o'r Senedd a oedd yn absennol o’r cyfarfod hwn ac o gyfarfodydd blaenorol y grŵp trawsbleidiol.

Awgrymwyd y dylai’r agenda ar gyfer y cyfarfod nesaf gynnwys cyflwyniad ynghylch 'Dyfodol Ein Bwyd Môr: Map Ffordd ar gyfer Cadwyn Gyflenwi Bwyd Môr Cymru'.

Diolchodd Mabon ap Gwynfor i bawb am ddod ac am gymryd rhan yn y drafodaeth.

Daeth y cyfarfod i ben.

Camau i’w cymryd:

1.     Bydd yr Ysgrifenyddiaeth yn rhannu’r sleidiau ar gyfer cyflwyniad Aoife Martin gyda'r rhai a oedd yn bresennol, a hynny ar gais.

2.    Bydd Aoife Martin a Jack James yn cysylltu â’i gilydd mewn perthynas â’r gwaith sy’n cael ei wneud yng Ngogledd Cymru o ran archwilio’r defnydd o gregyn gleision fel cynhwysyn cynaliadwy ar gyfer porthiant dyframaeth.

3.    Dylai pobl anfon manylion ynghylch yr heriau allweddol y dylid eu cynnwys yn llythyr y Cadeirydd at Lywodraeth Cymru erbyn dydd Gwener 20 Medi.

4.    Bydd y Cadeirydd yn cynnig dyddiadau posibl ar gyfer y cyfarfod nesaf.